行山前往千島湖，通常有兩個方法，一係從屯門掃管笏村開始，沿麥理浩徑慢慢行上千島湖清景台；二係元朗大棠開始，再慢慢向屯門方向行。小編選擇了第一條路線，帶著小朋友，或者是不常行山的城市人，建議由屯門出發，路程相對輕鬆。

千島湖真身其實係大欖涌水塘嘅景色之一，自從2019年起咗「千島湖清景台」之後，有一個靚位可以從高處280度咁望曬成個景色，先慢慢廣為人知。水塘係1957年已經落成，唔講你唔知，呢度係二戰後香港第一個興建嘅水塘。因為水庫原址係丘陵河谷，儲水後就會形成咗大大小小嘅島嶼，島上又種滿了山松、濕地松、大葉桉和檸檬桉⋯⋯於是乎，就形成咗大家睇到嘅千島湖靚景。

係屯門市中心搭小巴43號到掃管笏村，總站落車，沿白石坑方向至麥理浩徑第十段。（跟人流行就無錯，其實得一條路，多數唔會搞錯，其他方向都係入村。）如果駕車呢，沿車路行（小巴總站轉左），會見到村開嘅停車場，提供日租。小編當日去，一見到停車場就入去泊低咗架車，日泊$50，車位唔多，有就泊啦！落車後白石坑方行（向前行），見到另一個停車場，但價錢就$100，心底暗笑：好彩。

一路慢走，遇到正在攀樹嘅細路，正在放羊的牧羊人，正在食草嘅羊群⋯⋯道路平坦易行，全程石屎地，林木圍繞，非常易行。登山後，景色漸漸開揚，陸逐睇到水塘嘅面貌，即時心曠神恰！Yoho～～～～大概行9個字就到一個觀景點，隱約睇到「千島清」嘅風光，都多人影相，旁邊有指示牌標明「千島湖清景台」（臨時廁所隔離）。然後就進入山林，一系列山路，約行20分鐘就見到一塊畫上大欖涌水塘景色的告示板。沿旁邊以枯木及沙土搭建的梯階拾級而上，再步行約200米即可登上觀景台，俯瞰千島湖全貌。

睇完後可以選擇兩條路，，一家大細，體力一般，就原路返回屯門，快就1個鐘落去到，慢就1.5個鐘。途中有本地農場，可以休息吓，食杯雪梨蜜。有體力嘅，可以行落元朗大棠（逆走麥理浩徑第十段），再係搭港鐵巴士K66或公共小巴去元朗，但時間就長啲，至少預2個鐘啦。景色個人覺得一般，原路返回都OK～

停車場～

落車後向前行～

羊群食草中。

支持我們繼續營運

「拖手仔去街GUIDE」旅遊網一直由編輯K和M自掏腰包經營，由2016年至今已經幾年，背後並無任何BACKUP。亦由於我們不想太HARDSELL和賣廣告，一直以來極少接鱔稿JOB。

如覺得我們的資訊又用，想給我們一點鼓勵，請以PAYME或FPS打賞（SCAN QR CODE）。多多益善，少少無拘。

Payme: https://payme.hsbc/guideguidehk

FPS ID（轉數快）：0718742（姓名 HUI S*** M**）

沿路有指示，唔怕行錯。

攀樹的孩子。

上山後，景色漸漸開揚。

呢個位隔離有個臨時廁所，行過去啦，有牌指住清景台。

沿路愈來愈開闊～

沿路行去千島湖清景台，100%樹林Feel，好舒適。

行大概20分鐘，就見到呢個牌。恭喜你，行樓梯上去啦，到嚕！

PS：千島湖清景台於假日的遊人眾多，經常出現人潮過渡擠湧的情況，導致觀景台的山徑和設施出現嚴重耗損。請大家切記愛惜環境，勿自行開闢小路，並帶走自己帶來的垃圾。

原路落山，中間會經過呢間農場。太累可以入去，飲返杯凍檸蜜/雪梨水，由本地農作物新鮮沖泡而成，倍覺美味。另外也有農場出產的新鮮蔬菜，例如： 沙律菜、羽衣甘藍、紫蘇葉⋯⋯

價錢合理，不妨順便買些回家，嘗嘗香港菜！

位置就在上山前的必經之路，剛好在村和山的交界，山腳之下。