筲箕灣東大街出晒名係食街，要在一條有幾十間食肆林立的長街之中突圍而出，真係要有番一兩道板斧至得。　

由老闆身兼大廚的「席前」，採家庭式經營FEEL，以前在天后經營，走街坊親民路線，儲下一堆熟客仔，後來搬到東大街。早大半年，由於業主加租一度停業，後來才由街心搬到街尾，在現址繼續開業。主廚得老闆一人，所以要密密煮無停手，現在都鮮有空閒同客人打牙骹。食物以日式串燒為主，另有日式+港式FUSION炒麵飯，都係水準之作。不過講到最驚喜的必食推介，就係「芝心多」，焗好的麵包鬆軟又香口，咬落去，嘩，是半溶的芝士，沾上少少煉奶咁食，好味到唔停得口！！！卡路里超高吧～～但邪惡之物向來最美味。小編覺得，用來當做飯後甜品，簡直一流；每次都謹記，要預留胃部少少位置去安置它！

溫馨提示：若店內人多，老闆就未必肯整喇，因為製作需時呢！