遠在2.9年億至2.5億年前的二疊紀，地球冇人，連恐龍都未有，有的是遠古海洋生物、爬蟲、軟體動物、苔蘚等等，仲有好多火山活動，大埔馬屎洲的岩石就係喺果時開始沉積形成。

馬屎洲列入國家級地質公園，早前剛上榜時，很多人湊熱鬧去逛，但時日過去，現在已被人拋諸腦後啦！又成了一個，很多人都知道，卻未必會去的好地方！選個周末，帶著親愛的家人/伴侶/好友前去一日遊吧！！

必行自然教育徑，就位於小島東南面的沿海地區，有多個景點，也有指示牌解說各種地質現象，如億萬化石是怎樣形成的啦、海蝕係乜？風化係乜？褶曲又係乜？這些知識，不瞞大家說，小編S雖然高考和會考都有讀過地理，而且考得相當不錯，但到今時今日已經交番晒畀學校老師啦！去到現場，算係重溫一下；走在凹凸不平的石上沙上，只能小步小步行，停停看看：這裡的岩石不如之前介紹的西貢萬宜水庫般磅礡和震懾人心，不過睇下唔同的石頭紋理，都好得意，尤其好似神經血管的石英脈，同埋「香腸串」。
最大感覺還是很老土的：正所謂天地玄黃，宇宙洪荒；人生在世幾十年，喺時間洪流裡面，真係短過哥基狗隻腳啊。

詳情請看香港地質公園的介紹短片：https://www.youtube.com/watch?v=Q_0PnJZYihI

溫馨提示：
(1) 下車後步入三門仔村，留意第二個公廁附近，有個不甚起眼的指示牌寫著「馬屎洲特別地區」；
(2) 沿路步上鹽田仔的山徑，途中有好些山墳；上次小編去時可能近清明時節，沿路撒滿衣紙溪錢，還以為行錯路。只要慢慢向上走，可見八仙嶺風光，也能看到船灣海的魚排；
(3) 回程可選原路折返或乘小艇離開。通常都有船家海岸邊在兜客叫遊人包艇回三門仔，通常每人收十多二十元。